Batu Uloh, Biso Lemu Ughang Koto Alam

Batu Uloh

Pado zaman isuk2, samaso batu kompuh, ado saiku ulek sadang mangojoh labi. Konon kecek ughang tuo2, kalo zaman suk isuk de binatang raksasa kasadonyo. Tamasuk ulek nan sadang mangojoh labi ge, labi de yo godang pulo. Dalam pado itu, nampaklah dek rajo wakotu tu ulek sadang mangojoh labi ge, mako disintak a dek rajo cako podangnyo, dicatuk u dek e ulek de manjadi tabagi tigo. Jadilah takoghek2 ulek cako manjadi tigo bagian: bagian kapalo, bagian powuik, jo bagian iku. Nan kapalo ulek de tinggoh di tompeknyo di Koto Alam kini, kampong kito nan tacinto ge, topeknyo di batang ai nan banamo Lubuk Batu Uloh, di ateh Lubuk Ikan Banyak saketek. Kalo wak nak poi ka Koto Lamo, di sabolah kanan jalan, di saboghang sawah, tanyoon ajo ka ughang nan sadang basawah kek itu kalo ndak lo obe.

Manuwuik kecek ughang tuo2 juo, nan kapalonyo tinggoh di Koto Alam baubah manjadi batu, mambuek ughang  kampong kito banyak punyo lemu2 nan babiso. Lai apo juo lemu ughang di tompek lain, dak ka mempan tibo di kampong kito de, diisok o kasadonyo dek pengaruh kapalo ulek cako. Makonyo kampong kito terkenal sebagai kampong ughang2 balemu padek, alias ughang2 baisi bak nyie kito. Cukuik lemu ughang tuo2 kito de, sampai kini pun masih ado ughang2 nan padek lemu de.  Lai ka maninggam, kaboji, uduh, lemu silek, maubek ughang, bighiang, manaik in biso, jo sagalo mocomnyo banyak nan pandai kek kampong kito.

Tampak muko, bagian muncong/kapalo

Nan bagian powuik ulek cako anyuik ka bawuh basoto jo bagian iku. Powuiknyo tasangkuik di Manggilang, manjadi batu disitu, mako konon katonyo ughang Ngilang de pangonohnyo powuik ka powuik ajo nyie. Kemudian ikunyo lope ka Tanjong Boluik, manjadi batu pulo disitu. Konon pulo katonyo, mambuek ughang2 Tanjong Boluik cako manjadi ugahang2 codiak alias ughang2 panjang akanyo baboluik2.

Mitosnyo, kalo ughang Koto Alam nak poi maantau disarankan supayo maasa-asaan punggongnyo ka batu tu. Keceknyo supayo berhasil di antau.

tampak jak sampiang

Kalo diparotiin bonoh, memang batu de yo pas mirip jo kapalo ulek, bontuknyo bakeluk2 cando ulek, bulek pulo cando badan ulek, panjangnyo sekitar 8 meter.Batu de ndak lo manyatu jo tana de. Kalo wak caghi2, ndak ka ado batu nan soman itu de, itu manandokan bawosanyo memang botua adonyo carito candoo itu, pi ntah juola de, dak tontu dek wak de, semuanyo kuaso Tuhan.

tampak jak lakang

Dek banamo Batu Uloh, karono memang batu tu lah nan dikecek en sebagai kapalo ulek nan konai catuk de. Topi kini bahaso ughang Koto Alam la bauba, dulu lai basobuik uloh, kini la batuka jo ulek.

Kini batu tu de ndak ado dipandang2 bonoh dek masyarakat kito le, la ditumbuun dek somak2. Padohal iko bisa menjadi potensi wisata di tompek kito bisuak2nyo, seharusnyo kito tetap menjaga kelestariannyo. DUKUNG KAWAN-KAWAN!

Ko Foto2 Ambo di Batu Uloh de

Naik Ulek Godang

Siluman Ulek